വിജയ് – ശിവകാർത്തികേയൻ സിനിമകളുടെ പേരിൽ ആരാധക പോര്; പരാശക്തിയുടെ പോസ്റ്റർ വലിച്ചുകീറി

പൊങ്കൽ റിലീസായി എത്തുന്ന വിജയ്, ശിവകാർത്തികേയൻ ചിത്രങ്ങളെച്ചൊല്ലി ആരാധകർ തമ്മിൽ കയ്യാങ്കളി. വിജയ് നായകനാകുന്ന ‘ജനനായകൻ’, ശിവകാർത്തികേയൻ നായകനാകുന്ന ‘പരാശക്തി’ എന്നീ ചിത്രങ്ങളാണ് ബോക്സ് ഓഫീസിൽ ഏറ്റുമുട്ടുന്നത്. ഇരു താരങ്ങളും തമ്മിൽ സൗഹൃദത്തിലാണെങ്കിലും സിനിമകൾ ഒരേ സമയം തിയേറ്ററുകളിൽ എത്തുന്നതാണ് ആരാധകരെ പ്രകോപിപ്പിച്ചത്. മധുരയിലെ റിറ്റ്സി സിനിമാസിൽ ‘ജനനായകൻ’ ട്രെയിലർ ലോഞ്ചിനിടെയുണ്ടായ സംഭവങ്ങളാണ് ഇപ്പോൾ വലിയ വിവാദങ്ങൾക്ക് വഴിയൊരുക്കിയിരിക്കുന്നത്.

തിയേറ്ററിന് പുറത്ത് സ്ഥാപിച്ചിരുന്ന ശിവകാർത്തികേയന്റെ ‘പരാശക്തി’ സിനിമയുടെ പോസ്റ്ററുകൾ വിജയ് ആരാധകർ കൂട്ടത്തോടെ വലിച്ചുകീറി. ഇതിന്റെ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിക്കുകയാണ്. നേരത്തെ ‘പരാശക്തി’യുടെ പ്രീ-റിലീസ് ചടങ്ങിനിടെയും വിജയ് ആരാധകർ ബഹളം വെക്കുകയും ശിവകാർത്തികേയന്റെ പ്രസംഗം തടസ്സപ്പെടുത്താൻ ശ്രമിക്കുകയും ചെയ്തിരുന്നു.

ജനുവരി 9, 10 തീയതികളിലായാണ് രണ്ട് ചിത്രങ്ങളും റിലീസ് ചെയ്യുന്നത്. വലിയ ഹൈപ്പോടെ എത്തുന്ന ‘ജനനായക’നൊപ്പം ശിവകാർത്തികേയൻ ചിത്രം കൂടി പ്രദർശനത്തിന് എത്തുന്നത് തിയേറ്ററുകളുടെ എണ്ണത്തിലും കളക്ഷനിലും കുറവുണ്ടാക്കുമെന്നതാണ് വിജയ് ആരാധകരുടെ രോഷത്തിന് കാരണം. കേരളത്തിലെ മുഖ്യമന്ത്രി പിണറായി വിജയന്റെ മണ്ഡലത്തിലടക്കം തമിഴ് സിനിമകൾക്ക് വലിയ സ്വീകാര്യത ലഭിക്കാറുള്ളതിനാൽ കേരളത്തിലെ ഫാൻസ് ഗ്രൂപ്പുകളിലും ഈ തർക്കം ചർച്ചയായിട്ടുണ്ട്.