മലയാള സിനിമയിൽ 300 കോടി രൂപ കടക്കുന്ന ആദ്യ ചിത്രമായി ‘ലോക: ചാപ്റ്റർ 1 – ചന്ദ്ര’. ഡൊമിനിക് അരുൺ സംവിധാനം ചെയ്ത ഈ സൂപ്പർഹീറോ ചിത്രം മോഹൻലാൽ, മമ്മൂട്ടി തുടങ്ങിയ മുൻനിര താരങ്ങളുടെ ചിത്രങ്ങൾ ഉൾപ്പെടെയുള്ള നിരവധി റെക്കോർഡുകൾ തകർത്ത് മുന്നേറുകയാണ്. എക്കാലത്തെയും ഏറ്റവും കൂടുതൽ കളക്ഷൻ നേടിയ മലയാള ചിത്രം, കേരളത്തിൽ ഏറ്റവും കൂടുതൽ കളക്ഷൻ നേടിയ ചിത്രം എന്നീ നേട്ടങ്ങളും ‘ലോക’ സ്വന്തമാക്കി.
ഓഗസ്റ്റ് 28-ന് തിയേറ്ററുകളിൽ റിലീസ് ചെയ്ത ‘ലോക’, ഈ വർഷത്തെ അപ്രതീക്ഷിത വിജയമായി മാറി. കല്യാണി പ്രിയദർശൻ, നസ്ലെൻ, സാൻഡി എന്നിവർ പ്രധാന വേഷങ്ങളിൽ അഭിനയിച്ച ഈ ചിത്രം റിലീസ് ചെയ്ത് ആദ്യ 40 ദിവസത്തിനുള്ളിൽ 299.9 കോടി രൂപ കടക്കുകയും അതിനുശേഷം 300 കോടി രൂപ മറികടക്കുകയും ചെയ്തതായി സാക്നിൽക് (Sacnilk) റിപ്പോർട്ടുകൾ വ്യക്തമാക്കുന്നു. പൃഥ്വിരാജ് സുകുമാരൻ സംവിധാനം ചെയ്ത് മോഹൻലാൽ പ്രധാനവേഷത്തിലെത്തിയ ‘എൽ2- എമ്പുരാന്റെ’ 265.5 കോടി രൂപയുടെ റെക്കോർഡ് കളക്ഷനാണ് ‘ലോക’ മറികടന്നത്. 240 കോടി രൂപ നേടിയ ‘മഞ്ഞുമ്മൽ ബോയ്സ്’ നിലവിൽ മൂന്നാം സ്ഥാനത്തും, 234.5 കോടി രൂപ കളക്ഷൻ നേടിയ മോഹൻലാലിന്റെ ‘തുടരും’ നാലാം സ്ഥാനത്തുമാണ്.
ചിത്രത്തിന്റെ രണ്ടാം ഭാഗമായ ‘ലോക: ചാപ്റ്റർ 2’ ഇതിനോടകം പ്രഖ്യാപിച്ചു കഴിഞ്ഞു. ടൊവിനോ ആയിരിക്കും ഈ ഭാഗത്തിലെ കേന്ദ്ര കഥാപാത്രം. മൈക്കൽ എന്ന പേരുള്ള ചാത്തനായാണ് ടൊവിനോ എത്തുക. ദുൽഖർ സൽമാൻ ചാർലി എന്ന പേരുള്ള ഒടിയനായി ചിത്രത്തിൽ എത്താൻ സാധ്യതയുണ്ട്. ‘ലോക: ചാപ്റ്റർ 1’ ലും ഇരുവരും ചെറിയ വേഷങ്ങളിൽ പ്രത്യക്ഷപ്പെട്ടിരുന്നു. രണ്ടാം ഭാഗത്തിൽ കല്യാണി പ്രിയദർശനെയും പ്രേക്ഷകർക്ക് പ്രതീക്ഷിക്കാം.
Discover more from Radio Keralam 1476 AM News
Subscribe to get the latest posts sent to your email.
