ദൃശ്യത്തിന് ഹോളിവുഡ് റീമേക്ക് വരുന്നു

ജിത്തു ജോസഫ്-മോഹൻലാൽ കൂട്ടുകെട്ടിൽ ഒരുങ്ങിയ മലയാളം സൂപ്പർഹിറ്റ് ചിത്രം ദൃശ്യം വിദേശഭാഷകളിലേക്കും. ഫിലിപ്പിനോ, സിംഹള, ഇൻഡൊനീഷ്യൻ ഒഴികെയുള്ള എല്ലാ ഇന്ത്യൻ ഇതരഭാഷകളിലെയും നിർമാണാവകാശം സ്വന്തമാക്കിയതായി പനോരമ സ്റ്റുഡിയോസ് ഇന്റർനാഷണൽ അറിയിച്ചു. ദൃശ്യം രണ്ടുഭാഗങ്ങളും ഇതിലുൾപ്പെടും.

അജയ് ദേവ്ഗൻ പ്രധാനവേഷത്തിലെത്തിയ ദൃശ്യം 2-ന്‍റെ ഹിന്ദി റീമേക്ക് വൻവിജയം നേടിയതോടെയാണ് വിദേശഭാഷകളിലും പുനരവതരിപ്പിക്കാൻ പനോരമ സ്റ്റുഡിയോസ് തയ്യാറായത്. ഹോളിവുഡിലും കൊറിയൻ, ജാപ്പനീസ് ഭാഷകളിലും റീമേക്ക് ചെയ്യാനുള്ള ചർച്ചകൾ പുരോഗമിക്കുകയാണ്.

2013-ലാണ്‌ ദൃശ്യത്തിന്‍റെ ആദ്യഭാഗം മലയാളത്തിൽ പുറത്തിറങ്ങിയത്. 2021-ൽ രണ്ടാംഭാഗവും എത്തി. വൻസ്വീകാര്യതയാണ് രണ്ടുഭാഗങ്ങൾക്കും ലഭിച്ചത്. ഇതേത്തുടർന്ന് തെലുഗ്, ഹിന്ദി, തമിഴ് ഭാഷകളിൽ ചിത്രം റീമേക്ക് ചെയ്തിരുന്നു.