വിശുദ്ധ ഹറമിലെത്തുന്ന തീർഥാടകർക്കും സന്ദർശകർക്കും യാത്ര സുഗമമാക്കാൻ പുതിയ സംവിധാനവുമായി ഇരുഹറം കാര്യാലയ ജനറൽ അതോറിറ്റി. മൂന്നാം സൗദി വിപുലീകരണ ഭാഗത്തെ 92 കവാടങ്ങൾക്ക് നമ്പറുകൾ നൽകുന്ന പദ്ധതിക്ക് അതോറിറ്റി തുടക്കം കുറിച്ചു. പള്ളിക്കുള്ളിൽ വഴിതെറ്റുന്നത് ഒഴിവാക്കാനും കവാടങ്ങൾ പെട്ടെന്ന് തിരിച്ചറിയാനും ഈ പരിഷ്കാരം സഹായിക്കും.
ഹറമിനുള്ളിലെയും മുറ്റങ്ങളിലെയും ആൾക്കൂട്ടം നിയന്ത്രിക്കുക എന്ന ലക്ഷ്യവും ഈ നീക്കത്തിന് പിന്നിലുണ്ട്. ഇതിനായി കവാടങ്ങൾക്ക് സമീപം ആകർഷകമായ രീതിയിലുള്ള 92 സൈൻ ബോർഡുകൾ സ്ഥാപിച്ചു കഴിഞ്ഞു. ഹറമിന്റെ വാസ്തുവിദ്യാ ഭംഗിക്ക് അനുയോജ്യമായ രീതിയിലാണ് ഈ ബോർഡുകൾ രൂപകൽപ്പന ചെയ്തിരിക്കുന്നത്. വൻ തിരക്കുള്ള സമയങ്ങളിൽ തങ്ങൾ നിൽക്കുന്ന സ്ഥലം കൃത്യമായി മനസ്സിലാക്കാൻ തീർഥാടകർക്ക് ഇനി പ്രയാസമുണ്ടാകില്ല.
റമദാൻ മാസത്തിലെ വലിയ തിരക്ക് പരിഗണിച്ചാണ് ഈ പുതിയ സംവിധാനം വേഗത്തിൽ നടപ്പിലാക്കുന്നത്. കവാടങ്ങൾ കൃത്യമായി അടയാളപ്പെടുത്തുന്നത് സന്ദർശകർക്ക് കൂടുതൽ സുരക്ഷിതമായ അനുഭവം നൽകുമെന്ന് അതോറിറ്റി വക്താവ് പറഞ്ഞു. കൂട്ടംതെറ്റിപ്പോകുന്ന സാഹചര്യം ഒഴിവാക്കാനും നിശ്ചിത സ്ഥലങ്ങളിൽ എളുപ്പത്തിൽ എത്തിച്ചേരാനും പുതിയ നമ്പറിങ് തീർഥാടകരെ സഹായിക്കും.
