പതിമൂന്ന് വർഷം നീണ്ട നിയമനടപടികൾക്കൊടുവിൽ ചെങ്ങന്നൂർ വിശാൽ വധക്കേസിലെ മുഴുവൻ പ്രതികളെയും കോടതി വെറുതെ വിട്ടു. കേസിൽ പ്രതികളായിരുന്ന 19 ക്യാമ്പസ് ഫ്രണ്ട് പ്രവർത്തകർക്കെതിരെയും കുറ്റം തെളിയിക്കാൻ പ്രോസിക്യൂഷന് സാധിച്ചില്ലെന്ന് മാവേലിക്കര അഡീഷണൽ സെഷൻസ് കോടതി വിധിയിൽ വ്യക്തമാക്കി.
2012 ജൂലൈ 16-നാണ് കോന്നി എൻ.എസ്.എസ് കോളേജിലെ ഒന്നാം വർഷ ബിരുദ വിദ്യാർത്ഥിയും എ.ബി.വി.പി പ്രവർത്തകനുമായിരുന്ന വിശാൽ കുത്തേറ്റു മരിക്കുന്നത്. കോളേജ് ക്യാമ്പസിലുണ്ടായ സംഘടനാ തർക്കത്തിനിടെ വിശാൽ ആക്രമിക്കപ്പെടുകയായിരുന്നു എന്നാണ് പോലീസ് റിപ്പോർട്ട്. ആശുപത്രിയിലേക്ക് കൊണ്ടുപോകുന്ന വഴി വിശാൽ അക്രമികളെക്കുറിച്ച് വെളിപ്പെടുത്തിയിരുന്നെങ്കിലും, പ്രാദേശിക പോലീസിന്റെ അന്വേഷണം കാര്യക്ഷമമല്ലെന്ന ആക്ഷേപം ശക്തമായിരുന്നു.
പിന്നീട് കേസ് ക്രൈംബ്രാഞ്ചിന് കൈമാറുകയും അഞ്ച് വർഷത്തിന് ശേഷം കുറ്റപത്രം സമർപ്പിക്കുകയും ചെയ്തു. വിചാരണ വേളയിൽ സംഭവസ്ഥലത്തുണ്ടായിരുന്ന എസ്.എഫ്.ഐ, കെ.എസ്.യു പ്രവർത്തകർ ഉൾപ്പെടെയുള്ള സാക്ഷികൾ കൂറുമാറിയത് കേസിന് തിരിച്ചടിയായെന്ന് എ.ബി.വി.പി നേതൃത്വം ആരോപിച്ചു. കോടതി വിധിക്കെതിരെ ഉടൻ തന്നെ ഹൈക്കോടതിയിൽ അപ്പീൽ നൽകുമെന്ന് പ്രോസിക്യൂഷനും എ.ബി.വി.പിയും അറിയിച്ചു.
Discover more from Radio Keralam 1476 AM News
Subscribe to get the latest posts sent to your email.
