ഒമ്പത് വയസുകാരി അനയയുടെ മരണം ചികിത്സാ പിഴവെന്ന് അമ്മ; ഡോക്ടർമാർക്കെതിരെ നടപടി ആവശ്യപ്പെട്ട് പരാതി നൽകി

കോഴിക്കോട് താമരശ്ശേരിയിൽ അടുത്തിടെ മരണമടഞ്ഞ ഒമ്പത് വയസ്സുകാരി അനയയുടെ മരണം ഡോക്ടർമാരുടെ ഭാഗത്തുനിന്നുണ്ടായ ചികിത്സാ പിഴവുമൂലമാണെന്ന് അമ്മ രംബീസ ആരോപിച്ചു. ആശുപത്രി ജീവനക്കാർ വേണ്ടത്ര ശ്രദ്ധ നൽകിയില്ലെന്നും, താൻ നേരത്തെ ഉന്നയിച്ച സംശയങ്ങൾ പോസ്റ്റുമോർട്ടം റിപ്പോർട്ട് ശരിവെക്കുന്നതായും അവർ വ്യക്തമാക്കി.

ചികിത്സാ പിഴവിനെക്കുറിച്ച് വിശദമായ അന്വേഷണം ആവശ്യപ്പെട്ട് അനയയുടെ അമ്മ താമരശ്ശേരി ഡിവൈഎസ്പിക്ക് രേഖാമൂലം പരാതി നൽകിയിട്ടുണ്ട്. കൂടാതെ, സംഭവത്തിൽ ആരോഗ്യ വകുപ്പിനും പരാതി നൽകുമെന്നും, അന്ന് കുട്ടിയെ ചികിത്സിച്ച ഡോക്ടർമാർക്കെതിരെ കർശന നടപടി സ്വീകരിക്കണമെന്നും അവർ ആവശ്യപ്പെട്ടു.

ആശുപത്രിയിൽ ഡോക്ടറെ ആക്രമിക്കുന്നതിലേക്ക് നയിച്ച അനയയുടെ മരണകാരണം, ഇൻഫ്ളുവൻസ എ അണുബാധയുടെ സങ്കീർണതകൾ മൂലമുണ്ടായ വൈറൽ ന്യൂമോണിയയാണ് എന്നാണ് പോസ്റ്റുമോർട്ടം റിപ്പോർട്ടിൽ പറയുന്നത്.നേരത്തെ, കുട്ടി മരിച്ചത് അമീബിക് മസ്തിഷ്‌ക ജ്വരം (Amoebic Meningoencephalitis) മൂലമാണെന്നാണ് ആരോഗ്യ വകുപ്പ് അറിയിച്ചിരുന്നത്. പ്രാഥമിക പരിശോധനയിൽ കുട്ടിയുടെ തലച്ചോറിൽ അമീബയുടെ (ട്രോഫോസോയിറ്റ്) സാന്നിധ്യം കണ്ടെത്തിയെങ്കിലും, തിരുവനന്തപുരം സ്റ്റേറ്റ് പബ്ലിക് ഹെൽത്ത് ലാബിൽ നടത്തിയ പരിശോധനയിൽ ഈ ഫലം നെഗറ്റീവ് ആയിരുന്നു എന്നും പോസ്റ്റുമോർട്ടം റിപ്പോർട്ടിൽ വ്യക്തമാക്കുന്നു.