സെൻട്രൽ ബോർഡ് ഓഫ് സെക്കൻഡറി എജ്യുക്കേഷൻ (സിബിഎസ്ഇ) 2026-ലെ പത്താം ക്ലാസ്, പ്ലസ് ടു പരീക്ഷകളുടെ താൽക്കാലിക ടൈംടേബിൾ പുറത്തിറക്കി. ഫെബ്രുവരി 17-നാണ് പരീക്ഷകൾ ആരംഭിക്കുക.പത്താം ക്ലാസ് പരീക്ഷകൾ മാർച്ച് 9-ന് അവസാനിക്കുമ്പോൾ പന്ത്രണ്ടാം ക്ലാസ് പരീക്ഷകൾ ഏപ്രിൽ 9 വരെ നീണ്ടുനിൽക്കും. പത്താം ക്ലാസ് പരീക്ഷകൾ ഫെബ്രുവരി 17-ന് രാവിലെ 10:30-ന് ഗണിതശാസ്ത്രം വിഷയങ്ങളോടെ തുടങ്ങും. തുടർന്ന് മാർച്ച് 9-ന് ഭാഷാ, സംഗീത വിഷയങ്ങളോടെ ഇത് അവസാനിക്കും. പത്താം ക്ലാസിൽ ഒരു രണ്ടാംഘട്ട പരീക്ഷ കൂടിയുണ്ട്, അത് മെയ് 15-ന് ആരംഭിച്ച് ജൂൺ 1-ന് അവസാനിക്കും.
പന്ത്രണ്ടാം ക്ലാസ് പരീക്ഷകൾ ഫെബ്രുവരി 17-ന് തന്നെ ബയോടെക്നോളജി, എൻട്രപ്രണർഷിപ്പ് തുടങ്ങിയ വിഷയങ്ങളോടെ തുടങ്ങി ഏപ്രിൽ 9-ന് സംസ്കൃതം, ഡാറ്റാ സയൻസ് വിഷയങ്ങളോടെ സമാപിക്കും. മൂല്യനിർണയ പ്രക്രിയ സംബന്ധിച്ചും ബോർഡ് പുതിയ വിവരങ്ങൾ നൽകിയിട്ടുണ്ട്. ഓരോ വിഷയത്തിന്റെയും പരീക്ഷ കഴിഞ്ഞ് ഏകദേശം 10 ദിവസത്തിനുള്ളിൽ ഉത്തരക്കടലാസുകളുടെ മൂല്യനിർണയം തുടങ്ങുകയും 12 ദിവസത്തിനുള്ളിൽ പൂർത്തിയാക്കുകയും ചെയ്യും. ഉദാഹരണത്തിന്, 12-ാം ക്ലാസ് ഫിസിക്സ് പരീക്ഷ ഫെബ്രുവരി 20-ന് നടന്നാൽ, മൂല്യനിർണയം മാർച്ച് 3-ന് തുടങ്ങി മാർച്ച് 15-ന് അവസാനിക്കും.
ഇന്ത്യയിൽ നിന്നും 26 വിദേശ രാജ്യങ്ങളിൽ നിന്നുമായി ഏകദേശം 45 ലക്ഷം വിദ്യാർഥികളാണ് ഈ വർഷം പരീക്ഷ എഴുതാൻ കണക്കാക്കുന്നത്. ഇത് താൽക്കാലിക ടൈംടേബിൾ മാത്രമാണ്. വിദ്യാർഥികളുടെ അന്തിമ പട്ടിക സ്കൂളുകൾ സമർപ്പിച്ചതിന് ശേഷം അന്തിമ ഷെഡ്യൂൾ പ്രഖ്യാപിക്കുമെന്ന് സിബിഎസ്ഇ അറിയിച്ചു.
