നെസ്‌ലെ രണ്ട് വർഷത്തിനുള്ളിൽ 16,000 ജീവനക്കാരെ പിരിച്ചുവിടാൻ തീരുമാനിച്ചു

കിറ്റ് കാറ്റ്, നെസ്പ്രസ്സോ തുടങ്ങിയ പ്രമുഖ ബ്രാൻഡുകൾക്ക് ഉടമകളായ ഭക്ഷ്യ-പാനീയ കമ്പനിയായ നെസ്‌ലെ, അടുത്ത രണ്ട് വർഷത്തിനുള്ളിൽ 16,000 ജീവനക്കാരെ പിരിച്ചുവിടുമെന്ന് പ്രഖ്യാപിച്ചു. പുതിയ സി.ഇ.ഒ ആയി സെപ്റ്റംബറിൽ ചുമതലയേറ്റ ഫിലിപ്പ് നവ്രാറ്റിലിന്റെ കമ്പനിയുടെ പ്രവർത്തനങ്ങൾ വേഗത്തിലാക്കാനുള്ള ശ്രമങ്ങളുടെ ഭാഗമായാണ് ഈ നടപടി.

ലോകം മാറിക്കൊണ്ടിരിക്കുകയാണെന്നും അതിനനുസരിച്ച് നെസ്‌ലെയും അതിവേഗം മാറേണ്ടതുണ്ടെന്നും ഫിലിപ്പ് അഭിപ്രായപ്പെട്ടു. മാറുന്ന വിപണി സാഹചര്യങ്ങൾക്കനുസരിച്ച് ജീവനക്കാരുടെ എണ്ണം കുറയ്ക്കുന്നതിലൂടെ കമ്പനിയുടെ പ്രവർത്തനം കാര്യക്ഷമമാക്കുകയാണ് ഈ കൂട്ട പിരിച്ചുവിടലിലൂടെ ലക്ഷ്യമിടുന്നതെന്ന് അദ്ദേഹം വ്യക്തമാക്കി.

പിരിച്ചുവിടുന്ന 16,000 പേരിൽ 12,000 പേർ വൈറ്റ് കോളർ ജോലികളിൽ ഉള്ളവരാണ്. ഉത്പാദന, വിതരണ ശൃംഖല (പ്രൊഡക്ഷൻ, സപ്ലൈ ചെയിൻ) മേഖലയിൽ ഇതിനോടകം 4,000 പേരെ പിരിച്ചുവിട്ട് കഴിഞ്ഞു. ഈ പിരിച്ചുവിടൽ പ്രക്രിയയിലൂടെ ഒരു ബില്യൺ സ്വിസ് ഫ്രാങ്ക് ലാഭിക്കാൻ കഴിയുമെന്നാണ് കമ്പനി പ്രതീക്ഷിക്കുന്നത്.

വിൽപ്പനയിൽ 1.9 ശതമാനം വളർച്ച രേഖപ്പെടുത്തിയതിന് തൊട്ടുപിന്നാലെയാണ് ഈ പിരിച്ചുവിടൽ പ്രഖ്യാപനം. കമ്പനിയുടെ ഇന്ത്യൻ വിഭാഗമായ നെസ്‌ലെ ഇന്ത്യയും 2026 രണ്ടാം പാദത്തിൽ 17 ശതമാനം ഇടിവ് രേഖപ്പെടുത്തിയിട്ടുണ്ട്.