ലോക ടൂറിസം ദിനാചരണത്തിന്റെ ഭാഗമായി ബഹ്റൈനിൽ നാളെ (സെപ്റ്റംബർ 27) സൗജന്യ ബസ് ടൂർ നടക്കും. ‘ടൂറിസവും സുസ്ഥിര പരിവർത്തനവും’ എന്ന പ്രമേയത്തിൽ ആചരിക്കുന്ന ഈ വർഷത്തെ ആഘോഷങ്ങളുടെ ഭാഗമായാണ് ടൂർ. ബഹ്റൈൻ ടൂറിസം ആൻഡ് എക്സിബിഷൻസ് അതോറിറ്റി (ബിടിഇഎ) സംഘടിപ്പിക്കുന്ന ഈ പ്രത്യേക യാത്ര ഉച്ചകഴിഞ്ഞ് മൂന്ന് മണിക്കാണ് ആരംഭിക്കുക.
ബഹ്റൈനിലെ പ്രധാനപ്പെട്ട ചരിത്രപരവും സാംസ്കാരികവുമായ സ്ഥലങ്ങളിലൂടെയാണ് പര്യടനം. ഗതാഗത, ടെലികമ്മ്യൂണിക്കേഷൻ മന്ത്രാലയം, ബഹ്റൈൻ അതോറിറ്റി ഫോർ കൾച്ചർ ആൻഡ് ആന്റിക്വിറ്റീസ് (ബാക്ക), ദേശീയ പൗരത്വ മൂല്യങ്ങൾ പ്രോത്സാഹിപ്പിക്കാനുള്ള ‘ബഹ്റൈനൂന’ പദ്ധതി എന്നിവയുമായി സഹകരിച്ചാണ് ടൂർ ഒരുക്കിയിരിക്കുന്നത്.
ബഹ്റൈൻ നാഷണൽ മ്യൂസിയത്തിൽ നിന്ന് ആരംഭിക്കുന്ന യാത്രയിൽ ബാബ് അൽ ബഹ്റൈൻ, കനൂ മ്യൂസിയം എന്നിവയുൾപ്പെടെ രാജ്യത്തിന്റെ പ്രധാനപ്പെട്ട ലാൻഡ്മാർക്കുകളിലേക്കുള്ള സന്ദർശനം ഉൾപ്പെടും. രാജ്യത്തിന്റെ സമ്പന്നമായ ചരിത്രവും സാംസ്കാരിക സ്വത്വവും പ്രദർശിപ്പിക്കുന്ന ബഹ്റൈൻ നാഷണൽ മ്യൂസിയം ഗാലറി സന്ദർശനത്തോടെ ടൂർ അവസാനിക്കും.
ബഹ്റൈൻ ടൂറിസ്റ്റ് ഗൈഡുകളുടെ സംഘം യാത്രയിൽ പങ്കെടുക്കുന്നവർക്ക് രാജ്യത്തിന്റെ ചരിത്രപരവും സാംസ്കാരികവുമായ സ്ഥലങ്ങളെക്കുറിച്ച് ആഴത്തിലുള്ള വിവരങ്ങൾ നൽകും. സൗജന്യ ടൂറിൽ പങ്കെടുക്കാൻ പ്ലാറ്റിനംലിസ്റ്റ് പ്ലാറ്റ്ഫോം (www.platinumlist.net) വഴി മുൻകൂർ രജിസ്ട്രേഷൻ നിർബന്ധമാണ്. എല്ലാ സീറ്റുകളും നിറഞ്ഞുകഴിഞ്ഞാൽ രജിസ്ട്രേഷൻ അവസാനിക്കും.
