രാത്രികാലങ്ങളിൽ ഒറ്റയ്ക്ക് പുറത്തിറങ്ങി നടക്കുന്നതിന് ഏറ്റവും സുരക്ഷിതമായ രാജ്യങ്ങളുടെ പട്ടികയിൽ ഗൾഫ് രാജ്യങ്ങൾ മുന്നേറുന്നു. ആഗോള ഗവേഷണ സ്ഥാപനമായ ഗാലപ്പ് (Gallup) പുറത്തിറക്കിയ ഏറ്റവും പുതിയ റിപ്പോർട്ട് അനുസരിച്ച്, 144 രാജ്യങ്ങളിൽ ബഹ്റൈൻ ഒമ്പതാം സ്ഥാനത്തെത്തി. രാത്രിയിലെ സുരക്ഷ സംബന്ധിച്ച ജനങ്ങളുടെ കാഴ്ചപ്പാടുകൾ, നിയമവ്യവസ്ഥയിലുള്ള വിശ്വാസം, കുറ്റകൃത്യങ്ങളുടെ തോത് എന്നിവ അടിസ്ഥാനമാക്കിയാണ് ഈ റിപ്പോർട്ട് തയ്യാറാക്കിയിട്ടുള്ളത്.
ഈ പട്ടികയിൽ ഗൾഫ് രാജ്യങ്ങൾ മികച്ച പ്രകടനം കാഴ്ചവെച്ചു. ഒമാൻ (94%), സൗദി അറേബ്യ (93%), കുവൈത്ത് (91%), ബഹ്റൈൻ (90%), യു.എ.ഇ (90%) എന്നിവയെല്ലാം ആദ്യ പത്ത് സ്ഥാനങ്ങളിൽ ഇടം നേടി. ആഗോളതലത്തിൽ 98% സുരക്ഷാ നിരക്കുമായി സിംഗപ്പൂരാണ് പട്ടികയിൽ ഒന്നാം സ്ഥാനത്തുള്ളത്.
നിയമപാലന സംവിധാനങ്ങളിലുള്ള ജനങ്ങളുടെ ഉയർന്ന വിശ്വാസം, കുറഞ്ഞ കുറ്റകൃത്യ നിരക്ക്, മികച്ച ക്രമസമാധാന പാലനം എന്നിവയാണ് ഗൾഫ് രാജ്യങ്ങളുടെ ഈ നേട്ടത്തിന് പിന്നിലെ പ്രധാന കാരണങ്ങളെന്ന് റിപ്പോർട്ട് ചൂണ്ടിക്കാട്ടുന്നു.
