സംസ്ഥാനത്ത് വർധിച്ചുവരുന്ന അമീബിക് മസ്തിഷ്കജ്വരത്തെക്കുറിച്ച് ചർച്ച ചെയ്യാൻ നിയമസഭ നിർത്തിവെക്കാൻ അനുമതി നൽകി. എൻ.ഷംസുദീൻ എം.എൽ.എയുടെ അടിയന്തര പ്രമേയ നോട്ടീസിലാണ് ഈ നടപടി. ഉച്ചയ്ക്ക് 12 മണി മുതൽ രണ്ട് മണിക്കൂർ നേരത്തേക്കാണ് ചർച്ച. തുടർച്ചയായി രണ്ടാം ദിവസമാണ് ഈ വിഷയം നിയമസഭയിൽ എത്തുന്നത്. രോഗങ്ങൾ തടയുന്നതിൽ സർക്കാർ വേണ്ടത്ര ശ്രദ്ധിക്കുന്നില്ലെന്ന് നോട്ടീസിൽ ആരോപിക്കുന്നു.
സംസ്ഥാനത്ത് ഒരാൾക്ക് കൂടി അമീബിക് മസ്തിഷ്കജ്വരം സ്ഥിരീകരിച്ചിട്ടുണ്ട്. പാലക്കാട് പട്ടാമ്പി സ്വദേശിയായ 27 വയസ്സുകാരൻ കോഴിക്കോട് മെഡിക്കൽ കോളേജ് ആശുപത്രിയിൽ ചികിത്സയിലാണ്. രണ്ട് മാസം മുമ്പ് ഒരു നീന്തൽക്കുളത്തിൽ കുളിച്ചതിന് ശേഷമാണ് ഇദ്ദേഹത്തിന് രോഗലക്ഷണങ്ങൾ കണ്ടുതുടങ്ങിയത്. ഇതോടെ കോഴിക്കോട് ജില്ലയിൽ ചികിത്സയിലുള്ളവരുടെ എണ്ണം 11 ആയി. ഈ വർഷം മാത്രം സംസ്ഥാനത്ത് 17 പേരാണ് അമീബിക് മസ്തിഷ്കജ്വരം ബാധിച്ച് മരിച്ചത്.
കഴിഞ്ഞ ദിവസം തിരുവനന്തപുരം മുട്ടത്തറ സ്വദേശിനിയായ 52 വയസ്സുകാരിയും കൊല്ലം വെള്ളിനല്ലൂർ സ്വദേശിയായ 91 വയസ്സുകാരനും ഈ രോഗം ബാധിച്ച് മരിച്ചിരുന്നു. ഈ മാസം 11-നാണ് ഇരുവരും മരണപ്പെട്ടത്. കൂടാതെ, കഴിഞ്ഞ ദിവസം രണ്ട് പേർക്ക് കൂടി പുതിയതായി രോഗം സ്ഥിരീകരിക്കുകയും ചെയ്തു.
