ആമസോൺ പുതിയ കിൻഡിൽ കളർസോഫ്റ്റ് മോഡലുകൾ വിപണിയിലിറക്കി. ഇതിൽ $249.99 (ഏകദേശം 21,720.75 രൂപ) വിലവരുന്ന 16GB മോഡലും, $269.99 (ഏകദേശം 23,456.45 രൂപ) വിലയുള്ള ആദ്യത്തെ കിൻഡിൽ കളർസോഫ്റ്റ് കിഡ്സ് എഡിഷനും ഉൾപ്പെടുന്നു. ഇ-ബുക്കുകൾ, കോമിക്സ്, ഗ്രാഫിക് നോവലുകൾ എന്നിവയിൽ വർണ്ണാഭമായ കാഴ്ചാനുഭവം നൽകി വായന മെച്ചപ്പെടുത്തുക എന്നതാണ് ഈ രണ്ട് മോഡലുകളുടെയും പ്രധാന ലക്ഷ്യം.
പുതിയ 16GB കിൻഡിൽ കളർസോഫ്റ്റ് മോഡലിൽ ഉയർന്ന കോൺട്രാസ്റ്റ് ഉള്ള കളർസോഫ്റ്റ് ഡിസ്പ്ലേ, വേഗത്തിൽ പേജുകൾ മറിക്കാനുള്ള കഴിവ്, ക്രമീകരിക്കാവുന്ന ലൈറ്റിംഗ്, മെച്ചപ്പെട്ട ബാറ്ററി ലൈഫ്, ആമസോണിന്റെ ഇ-ബുക്ക് സ്റ്റോറിലേക്കുള്ള എളുപ്പത്തിലുള്ള പ്രവേശനം എന്നിവ നിലനിർത്തിയിട്ടുണ്ട്. ഇപ്പോൾ വായനക്കാർക്ക് വർണ്ണാഭമായ പുസ്തക കവറുകൾ കാണാനും ചിത്രങ്ങൾ ആസ്വദിക്കാനും ഗ്രാഫിക് നോവലുകൾ വ്യക്തമായ വിശദാംശങ്ങളോടെ വായിക്കാനും സാധിക്കും. കളർ-കോഡഡ് ഹൈലൈറ്റിംഗ് ഓപ്ഷനുകളും എളുപ്പത്തിൽ വായിക്കാൻ സഹായിക്കുന്ന പേജ് കളർ സവിശേഷതയും ഇതിൽ ലഭ്യമാണ്.
കുട്ടികൾക്കായി ആമസോൺ പുറത്തിറക്കിയ കിൻഡിൽ കളർസോഫ്റ്റ് കിഡ്സ് ആണ് ആദ്യത്തെ കളർ കിൻഡിൽ. മനോഹരമായ കവർ ഡിസൈൻ, ഒരു വർഷത്തെ ആമസോൺ കിഡ്സ്+ സബ്സ്ക്രിപ്ഷൻ, രണ്ട് വർഷത്തെ ഗ്യാരണ്ടി എന്നിവയോടുകൂടിയാണ് ഈ കിൻഡിൽ വരുന്നത്. കൂടുതൽ വായനാ സമയം പ്രോത്സാഹിപ്പിക്കുന്നതിനായി രൂപകൽപ്പന ചെയ്ത ഈ ഉപകരണത്തിൽ വോക്കാബുലറി ബിൽഡർ, വേഡ് വൈസ്, ഓപ്പൺ ഡിസ്ലെക്സിക് ഫോണ്ട്, ഓഡിയോ ബുക്കുകൾക്കായി ബ്ലൂടൂത്ത് പിന്തുണ തുടങ്ങിയ സവിശേഷതകളുണ്ട്. മാതാപിതാക്കൾക്ക് ആമസോൺ പാരന്റ് ഡാഷ്ബോർഡ് വഴി കുട്ടികളുടെ വായനാ പുരോഗതി നിരീക്ഷിക്കാനും ഉപയോഗ നിയന്ത്രണങ്ങൾ സജ്ജീകരിക്കാനും സാധിക്കും. കുട്ടികൾക്ക് ഫാന്റസി റിവർ അല്ലെങ്കിൽ സ്റ്റാർലൈറ്റ് റീഡിങ് പോലുള്ള കവറുകളിൽ നിന്ന് ഇഷ്ടമുള്ളത് തിരഞ്ഞെടുക്കാനും അവസരമുണ്ട്.
2024-ൽ കിൻഡിൽ കിഡ്സ് വായനക്കാർ ശരാശരി വായനക്കാരേക്കാൾ 46% കൂടുതൽ സമയം ഗ്രാഫിക് നോവലുകൾ വായിക്കാൻ ചെലവഴിച്ചതായി ആമസോൺ മുൻപ് വ്യക്തമാക്കിയിരുന്നു. ഇത് കണക്കിലെടുത്ത്, ആമസോൺ കിഡ്സ്+ ഈ വേനൽക്കാലത്ത് ആർട്ടെമിസ് ഫൗൾ, ബിഗ് നേറ്റ്, പെർസി ജാക്സൺ, സ്റ്റോം റണ്ണർ, അരു ഷാ സീരീസ് എന്നിവയുൾപ്പെടെ പുതിയ പുസ്തകങ്ങൾ ചേർക്കാനും പദ്ധതിയിടുന്നുണ്ട്.
