എയർ ഇന്ത്യയുടെ ബോയിങ് വിമാനങ്ങളിലെ ഇന്ധന നിയന്ത്രണ സ്വിച്ചുകളുടെ ലോക്കിങ് സംവിധാനത്തിൽ യാതൊരു പ്രശ്നങ്ങളുമില്ലെന്ന് എയർ ഇന്ത്യ അറിയിച്ചു. ഡയറക്ടറേറ്റ് ജനറൽ ഓഫ് സിവിൽ ഏവിയേഷന്റെ (ഡിജിസിഎ) നിർദേശപ്രകാരം നടത്തിയ വിശദമായ പരിശോധനകൾക്കൊടുവിലാണ് ഈ കണ്ടെത്തൽ. ജൂൺ 12-ന് 271 പേരുടെ ജീവൻ അപഹരിച്ച ബോയിങ് ഡ്രീംലൈനർ 787 വിമാനാപകടത്തിന് പിന്നാലെയാണ് ഇന്ധന നിയന്ത്രണ സ്വിച്ചുകളെക്കുറിച്ചുള്ള ആശങ്കകൾ ഉയർന്നത്. പ്രാഥമിക റിപ്പോർട്ടിൽ വിമാനത്തിന്റെ ഇന്ധന സ്വിച്ചുകൾ ‘കട്ട് ഓഫ്’ സ്ഥാനത്ത് കണ്ടെത്തിയതിനെത്തുടർന്ന്, എയർ ഇന്ത്യ സ്വമേധയാ പരിശോധനകൾ ആരംഭിച്ചിരുന്നു. എന്നാൽ, ഇന്ധന നിയന്ത്രണ സ്വിച്ചുകൾ അബദ്ധത്തിൽ ഓഫ് പൊസിഷനിലാകാൻ സാധ്യതയില്ലെന്ന് ഉറപ്പാക്കാൻ കൂടുതൽ പരിശോധനകൾ ആവശ്യമാണെന്ന് ഡിജിസിഎ വിലയിരുത്തി. ഇതിന്റെ അടിസ്ഥാനത്തിൽ, ജൂലൈ 21-നകം ചില വിമാന മോഡലുകളിലെ ഇന്ധന സ്വിച്ചുകൾ പരിശോധിക്കാൻ ജൂൺ 14-ന് ഡിജിസിഎ എയർ ഇന്ത്യയോട് നിർദ്ദേശിക്കുകയായിരുന്നു.
ടാറ്റയുടെ ഉടമസ്ഥതയിലുള്ള എയർ ഇന്ത്യയും അനുബന്ധ സ്ഥാപനമായ എയർ ഇന്ത്യ എക്സ്പ്രസും ഡിജിസിഎയുടെ നിർദ്ദേശങ്ങൾ കൃത്യമായി പാലിച്ചുവെന്ന് പ്രസ്താവനയിൽ അറിയിച്ചു. ‘പരിശോധനകളിൽ, ലോക്കിങ് സംവിധാനത്തിൽ ഒരു പ്രശ്നവും കണ്ടെത്തിയില്ല. ജൂലൈ 12-ന് എയർ ഇന്ത്യ സ്വമേധയാ ആരംഭിച്ച പരിശോധനകൾ ഡിജിസിഎ നിശ്ചയിച്ച സമയപരിധിക്കുള്ളിൽ പൂർത്തിയാക്കി. ഇത് റെഗുലേറ്ററെ അറിയിച്ചിട്ടുണ്ട്,’ എയർ ഇന്ത്യ വ്യക്തമാക്കി. യുഎസ് റെഗുലേറ്ററായ ഫെഡറൽ ഏവിയേഷൻ അഡ്മിനിസ്ട്രേഷനും (എഫ്എഎ) ബോയിങ്ങും നേരത്തെ തന്നെ ബോയിങ് വിമാനങ്ങളിലെ ഇന്ധന നിയന്ത്രണ സ്വിച്ചുകളുടെ ലോക്കിങ് സംവിധാനം സുരക്ഷിതമാണെന്ന് ഉറപ്പ് നൽകിയിരുന്നു.
അഹമ്മദാബാദ് വിമാനാപകടവും തുടരന്വേഷണവും
അഹമ്മദാബാദിൽ നടന്ന വിമാനാപകടത്തിന്റെ പ്രാഥമിക അന്വേഷണ റിപ്പോർട്ടിൽ, ടേക്ക് ഓഫ് ചെയ്ത് നിമിഷങ്ങൾക്കകം വിമാനത്തിന്റെ രണ്ട് എൻജിനുകളും നിലച്ചതാണ് അപകടത്തിന് കാരണമെന്ന് കണ്ടെത്തിയിരുന്നു. എൻജിനുകളിലേക്ക് ഇന്ധനം നൽകുന്ന സ്വിച്ചുകൾ ഓഫ് ആയിരുന്നതാണ് ഇതിന് ഇടയാക്കിയത്. അപകടസമയത്ത് പൈലറ്റുമാർക്കിടയിൽ നടന്ന സംഭാഷണത്തിന്റെ ശബ്ദരേഖയും പുറത്തുവന്നിരുന്നു, അതിൽ ഒരു പൈലറ്റ് സ്വിച്ച് ഓഫ് ചെയ്തത് ആരാണെന്ന് ചോദിക്കുകയും താനല്ലെന്ന് മറ്റേ പൈലറ്റ് മറുപടി നൽകുകയും ചെയ്യുന്നുണ്ട്. സ്വിച്ചുകൾ ഓഫായിരുന്നെന്ന് മനസ്സിലാക്കി പൈലറ്റുമാർ വേഗത്തിൽ ഓൺ ചെയ്തെങ്കിലും, എൻജിനുകൾ വീണ്ടും പ്രവർത്തിക്കുന്നതിന് മുമ്പ് തന്നെ വിമാനം തകർന്നു വീഴുകയായിരുന്നുവെന്ന് റിപ്പോർട്ട് പറയുന്നു. അപകടത്തിന്റെ യഥാർത്ഥ കാരണം കണ്ടെത്താൻ വിശദമായ അന്വേഷണം വേണമെന്ന് എയർക്രാഫ്റ്റ് ആക്സിഡന്റ് ഇൻവെസ്റ്റിഗേഷൻ ബ്യൂറോ (AAIB) അവരുടെ റിപ്പോർട്ടിൽ നിർദ്ദേശിച്ചിട്ടുണ്ട്.
