മനുഷ്യന്റെ മനസ്സ് വായിച്ചെടുക്കും, എടുക്കാനുദ്ദേശിക്കുന്ന തീരുമാനം മുൻകൂട്ടി കണ്ടെത്തും; അറിയാം സെന്റോർ AI യെക്കുറിച്ച്

നമ്മുടെ ചിന്തകളും വികാരങ്ങളും പലപ്പോഴും നമ്മളിൽത്തന്നെ ഒതുങ്ങിനിൽക്കാറുണ്ട്, പ്രിയപ്പെട്ടവർക്ക് പോലും ചിലപ്പോൾ പൂർണ്ണമായി മനസ്സിലാക്കാൻ കഴിയില്ല. എന്നാൽ, നമ്മുടെ മനസ്സറിയുകയും ചിന്തകൾ വായിച്ചെടുക്കുകയും ചെയ്യുന്ന ഒരു ആർട്ടിഫിഷ്യൽ ഇന്റലിജൻസ് മോഡലിനെക്കുറിച്ച് നിങ്ങൾ ചിന്തിച്ചിട്ടുണ്ടോ? അത് അസാധ്യമായി തോന്നിയേക്കാം.എന്നാൽ, ആ അസാധ്യം സാധ്യമാക്കുന്ന ഒരു എ.ഐ. മോഡലാണ് സെന്റോർ AI. മനുഷ്യൻ എടുക്കാൻ പോകുന്ന തീരുമാനങ്ങളെ കൃത്യതയോടെ പ്രവചിക്കാൻ ഈ നൂതന എ.ഐക്ക് കഴിയും. ഹെൽംഹോൾട്സ് മ്യൂണിച്ചിലെ ഇൻസ്റ്റിറ്റ്യൂട്ട് ഫോർ ഹ്യൂമൻ-സെന്റേർഡ് എ.ഐ വിഭാഗത്തിലെ ഗവേഷകരാണ് സെന്റോർ AI വികസിപ്പിച്ചത്.

പ്രവർത്തന രീതിയും പ്രത്യേകതകളും

മനുഷ്യന്റെ തലച്ചോറിൽ ഇൻസ്റ്റാൾ ചെയ്ത ഒരു കമ്പ്യൂട്ടറിനോടാണ് സെന്റോർ AI യുടെ പ്രവർത്തനത്തെ ഗവേഷകർ ഉപമിക്കുന്നത്. മറ്റ് AI മോഡലുകളിൽ നിന്ന് ഇതിനെ വ്യത്യസ്തമാക്കുന്നത്, മനുഷ്യ മനസ്സിനെ വായിച്ചെടുക്കാനുള്ള അതിന്റെ സവിശേഷമായ കഴിവാണ്. ജൂലൈ 2-ന് നേച്ചർ ജേണലിൽ പ്രസിദ്ധീകരിച്ച പഠനത്തിലാണ് ഈ കണ്ടുപിടുത്തത്തെക്കുറിച്ച് വിശദീകരിച്ചിരിക്കുന്നത്. മനുഷ്യന്റെ പെരുമാറ്റങ്ങളെ യാഥാർത്ഥ്യബോധത്തോടെ പ്രതിഫലിപ്പിക്കുന്ന പ്രതികരണങ്ങൾ സൃഷ്ടിക്കാൻ സെന്റോറിന് സാധിക്കുന്നു.

മനുഷ്യന്റെ പെരുമാറ്റം മനസ്സിലാക്കാനും അത് പ്രവചിക്കാനും കഴിയുന്ന രീതിയിലാണ് സെന്റോർ AI യെ രൂപകൽപ്പന ചെയ്തിരിക്കുന്നത്. 160 മനഃശാസ്ത്ര പരീക്ഷണങ്ങളിൽ നിന്നുള്ള വിവരങ്ങൾ ഉപയോഗിച്ച്, ഒരു വലിയ ഭാഷാ മാതൃക (LLM) രൂപകൽപ്പന ചെയ്താണ് ഗവേഷകർ ഇത് സാധ്യമാക്കിയത്. ഏകദേശം 60,000 ആളുകൾ പത്ത് ദശലക്ഷത്തിലധികം തീരുമാനങ്ങൾ വിവിധ സാഹചര്യങ്ങളിൽ എങ്ങനെ എടുത്തു എന്ന് നിരീക്ഷിച്ച് നടത്തിയ പഠനത്തെ അടിസ്ഥാനമാക്കിയാണ് ഇത് വികസിപ്പിച്ചത്. മനുഷ്യൻ ഒരു തീരുമാനത്തിലെത്താൻ ഉപയോഗിക്കുന്ന രീതികൾ എ.ഐ ചാറ്റ്‌ബോട്ടുകൾ പഠിക്കാൻ തുടങ്ങിയിരിക്കുന്നു എന്നതിന്റെ സൂചനയാണ് ഇത്.

അക്കാദമിക പ്രാധാന്യവും കഴിവുകളും

ഈ കണ്ടുപിടുത്തം വൈജ്ഞാനിക ശാസ്ത്രത്തിലെ ഒരു അമൂല്യ സംഭാവനയായി മാറുമെന്നാണ് ഗവേഷകർ വിശ്വസിക്കുന്നത്. മെറ്റയുടെ ലാമ 3.1 ഭാഷാ മാതൃകയിലാണ് സെന്റോർ AI നിർമ്മിച്ചിരിക്കുന്നത്.

ഒരാഴ്ച നീണ്ടുനിന്ന നിരവധി മനഃശാസ്ത്ര പരിശീലനങ്ങളിലൂടെ കടന്നുപോയ സെന്റോർ, വളരെ കൃത്യതയോടെയാണ് പ്രതികരിച്ചത്. നിലവിലുള്ള പരമ്പരാഗത മോഡലുകളെക്കാൾ മികച്ച പ്രകടനമാണ് സെന്റോർ AI കാഴ്ചവച്ചത്. സെന്റോറിനെ വ്യതിരിക്തമാക്കുന്ന പ്രധാന ഘടകം, സാമാന്യവൽക്കരിക്കാനുള്ള അതിന്റെ കഴിവാണ്. പൂർണ്ണമായും പുതിയ സാഹചര്യങ്ങളെ കൈകാര്യം ചെയ്യാനും ഒരു വ്യക്തി എങ്ങനെ പെരുമാറുമെന്ന് അവിശ്വസനീയമാംവിധം കൃത്യമായി പ്രവചിക്കാനും ഇതിന് സാധിക്കും.

മുൻപ് നൽകിയിട്ടില്ലാത്ത പ്രശ്‌നങ്ങൾക്ക് പോലും ഇത് ഉത്തരം കണ്ടെത്തുന്നു. ചില സന്ദർഭങ്ങളിൽ ഒരു യഥാർത്ഥ വ്യക്തിയുമായിട്ടാണ് സംവദിക്കുന്നത് എന്ന തോന്നൽ ഇത് ഉണ്ടാക്കിയത്രേ. അതിന്റെ ഉത്തരങ്ങൾ ഒരു നിഷ്പക്ഷനായ വ്യക്തിയിൽ നിന്ന് ലഭിക്കുന്നതിന് സമാനമായിരുന്നു എന്നും നിരീക്ഷിക്കപ്പെടുന്നു. മനുഷ്യന്റെ തലച്ചോറിന് സമാനമായ ആന്തരിക പാറ്റേണുകൾ ഉള്ളതുകൊണ്ട്, മനുഷ്യന്റെ അറിവിനോട് ഏറ്റവും അടുത്ത AI ആയാണ് സെന്റോറിനെ കണക്കാക്കുന്നത്.