സൗദി അറേബ്യയിലെ തൊഴിൽ മേഖലയിലെ പ്രധാന പ്ലാറ്റ്ഫോമായ ഖിവയ്ക്ക് വൻ സ്വീകാര്യത. മാനവ വിഭവശേഷി, സാമൂഹിക വികസന മന്ത്രാലയത്തിന്റെ കീഴിലുള്ള ഈ പ്ലാറ്റ്ഫോമിൽ രജിസ്റ്റർ ചെയ്തവരുടെ എണ്ണം ഏകദേശം 1.5 കോടിയിലെത്തി. ഇതിലൂടെ രജിസ്റ്റർ ചെയ്യപ്പെട്ട തൊഴിൽ കരാറുകളുടെ എണ്ണം 1.10 കോടി കടന്നതായും മന്ത്രാലയം അറിയിച്ചു.
തൊഴിൽ സേവനങ്ങളും കരാറുകളും എളുപ്പത്തിൽ ലഭ്യമാക്കുക എന്ന ലക്ഷ്യത്തോടെ ആരംഭിച്ച ഖിവയിൽ, 2025-ൽ മാത്രം 10 ലക്ഷം പുതിയ ഉപയോക്താക്കളാണ് ചേർന്നത്. 80 ലക്ഷം ജീവനക്കാരുടെയും 14 ലക്ഷം സ്ഥാപനങ്ങളുടെയും വെബ്സൈറ്റുകൾ ഇതിൽ ഉൾപ്പെടുന്നു. വേതന സംരക്ഷണം, സൗദിവൽക്കരണം, ശമ്പള സർട്ടിഫിക്കറ്റുകൾ എന്നിവയുൾപ്പെടെ നിരവധി സേവനങ്ങൾ പ്ലാറ്റ്ഫോം വഴി ലഭ്യമാണ്.
കൂടാതെ, 1.5 ലക്ഷം സേവന കൈമാറ്റ അപേക്ഷകൾ, ഹജ്ജ്, ഉംറ സീസണുകൾക്കായി 40,000 താൽക്കാലിക വിസകൾ, 1.91 ലക്ഷം തൊഴിൽ മാറ്റ അപേക്ഷകൾ, 2.47 ലക്ഷം തൊഴിൽ വിവര തിരുത്തലുകൾ എന്നിവയും ഖിവ വഴി ഇതിനോടകം പൂർത്തിയാക്കിയിട്ടുണ്ട്. സൗദിയിലെ തൊഴിൽ വിപണിയെ കൂടുതൽ കാര്യക്ഷമമാക്കാനും സുതാര്യവും വിശ്വസനീയവുമാക്കാനും ലക്ഷ്യമിട്ടാണ് ഈ പ്ലാറ്റ്ഫോം പ്രവർത്തിക്കുന്നത്.
