ഇന്ത്യക്കാർ അടക്കമുള്ള തൊഴിലാളികളുടെ ക്ഷേമവും അവകാശ സംരക്ഷണവും ഉറപ്പാക്കുന്ന മികച്ച സ്ഥാപനങ്ങളെയും മാതൃകയായ തൊഴിലാളികളെയും ആദരിച്ച് ദുബായ് സർക്കാറിന്റെ തഖ്ദീർ പുരസ്കാരങ്ങൾ കഴിഞ്ഞ ദിവസം വിതരണം ചെയ്തു. ദുബായ് വേൾഡ് ട്രേഡ് സെൻട്രറിൽ ശൈഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂമിന്റെ രക്ഷാകർതൃത്വത്തിൽ സംഘടിപ്പിച്ച ചടങ്ങിൽ ശൈഖ് മൻസൂർ ബിൻ മുഹമ്മദ് ബിൻ റാഷിദ് അൽ മക്തൂം ജേതാക്കൾക്ക് അവാർഡുകൾ സമ്മാനിച്ചു.സുരക്ഷിതവും മാന്യവുമായ തൊഴിൽ സാഹചര്യം ഒരുക്കുന്ന സ്ഥാപനങ്ങളെ ആദരിക്കുന്ന സർക്കാർ തലത്തിലുള്ള ലോകത്തിലെ ആദ്യത്തെ പോയിന്റ് അടിസ്ഥാനത്തിലുള്ള പുരസ്കാരമാണ് തഖ്ദീർ. നിർമാണ മേഖലയെ കേന്ദ്രീകരിച്ച് ആരംഭിച്ച പദ്ധതി ഇന്ന് വിവിധ സാമ്പത്തിക മേഖലകളിലേക്കും വ്യാപിപ്പിക്കപ്പെട്ടിരിക്കുകയാണ്. പുരസ്കാര ജേതാക്കൾക്ക് നിരവധി ആനുകൂല്യങ്ങളോടൊപ്പം 10 ലക്ഷം യു.എ.ഇ. ദിർഹം പാരിതോഷികവും ലഭിക്കും.
തൊഴിൽ രംഗത്ത് ഉന്നത നിലവാരവും തൊഴിലാളി സൗഹൃദ നയങ്ങളും ഉറപ്പാക്കുകയും ഉൽപ്പാദനക്ഷമത വർദ്ധിപ്പിക്കുന്ന സൃഷ്ടിപരമായ തൊഴിൽ അന്തരീക്ഷം രൂപപ്പെടുത്തുകയും ചെയ്യുന്ന കമ്പനികളെ പ്രോത്സാഹിപ്പിക്കുകയാണ് അവാർഡിന്റെ ലക്ഷ്യം. ചടങ്ങിൽ യു.എ.ഇ. മാനവ വിഭവശേഷി, സ്വദേശിവൽക്കരണ മന്ത്രി ഡോ. അബ്ദുൽറഹ്മാൻ അൽ അവർ, ജി ഡി ആർ എഫ് എ ദുബായ് മേധാവി ലഫ്. ജനറൽ മുഹമ്മദ് അഹമ്മദ് അൽ മർറി, ദുബായ് സ്പോർട്സ് കൗൺസിൽ സെക്രട്ടറി ജനറൽ സഈദ് ഹരേബ്, ജിഡിആർഎഫ്എ ഉപമേധാവിയും തഖ്ദീർ അവാർഡ് കമ്മിറ്റി ചെയർമാനുമായ മേജർ ജനറൽ ഒബൈദ് മുഹൈർ ബിൻ സുറൂർ എന്നിവർ ഉൾപ്പെടെ നിരവധി ഉന്നത ഉദ്യോഗസ്ഥരും കമ്പനി പ്രതിനിധികളും തൊഴിലാളികളും പങ്കെടുത്തു.
ഏറ്റവും മികച്ച സ്ഥാപനങ്ങൾക്ക് 7-സ്റ്റാർ ക്ലാസിഫിക്കേഷൻ നൽകുന്ന സംവിധാനം ഈ വർഷം നടപ്പാക്കി. അവാർഡിന്റെ മാനദണ്ഡങ്ങളും വിലയിരുത്തൽ രീതികളും കൂടുതൽ ശക്തമാക്കിയതായി മേജർ ജനറൽ ഒബൈദ് മുഹൈർ ബിൻ സുറൂർ അറിയിച്ചു.ഈ വർഷം Bayer Middle East FZE 7-സ്റ്റാർ ക്ലാസിഫിക്കേഷൻ നേടി. Airbus Africa & Middle East 6-സ്റ്റാർ നേടി. 5-സ്റ്റാർ വിഭാഗത്തിൽ Petronash FZE, Dulsco Group, Crown Emirates Company LTD., Aries Marine and Engg. Services LCC, SD – Middle East LLC, Nestlé Dubai Manufacturing എന്നീ സ്ഥാപനങ്ങൾ വിജയിച്ചു. റിയൽ എസ്റ്റേറ്റ്, മാനുഫാക്ചറിംഗ്, പ്രൊഫഷണൽ സർവീസസ് മേഖലകളിലെ സ്ഥാപനങ്ങൾക്കും ഉപവിഭാഗ അവാർഡുകൾ നൽകി.
മുൻകാല പതിപ്പുകളിലായി 15,677 പേർ പങ്കെടുത്തതിൽ 165 കമ്പനികൾ ആദരിക്കപ്പെട്ടു. മൊത്തം പങ്കാളിത്തത്തിൽ 23 ശതമാനം വർധനവുണ്ടായതായി അധികൃതർ വ്യക്തമാക്കി. സ്ഥാപനങ്ങളുടെ പ്രവർത്തനം, തൊഴിൽ സംസ്കാരം, തൊഴിലാളികളോടുള്ള സമീപനം, ഫലപ്രാപ്തി എന്നിവ സമഗ്രമായി വിലയിരുത്തിയാണ് അവാർഡ് നിർണയം നടത്തുന്നത്. തൊഴിൽ അന്തരീക്ഷം മെച്ചപ്പെടുത്താനും ഉൽപ്പാദനക്ഷമത ഉയർത്താനും തൊഴിലാളി അവകാശങ്ങൾ ശക്തിപ്പെടുത്താനും തഖ്ദീർ അവാർഡ് സഹായിച്ചിട്ടുണ്ടെന്ന് അധികൃതർ പറഞ്ഞു.
‘Dubai 7×7’ പദ്ധതി പ്രഖ്യാപിച്ചു
ചടങ്ങിനിടെ, ജനറൽ ഡയറക്ടറേറ്റ് ഓഫ് ഐഡന്റിറ്റി ആൻഡ് ഫോറിനേഴ്സ് അഫയേഴ് സും ദുബായ് സ്പോർട്സ് കൗൺസിൽ ചേർന് ചേർന്ന് “Dubai 7×7” എന്ന പുതിയ പദ്ധതി പ്രഖ്യാപിച്ചു. മൂന്ന് ലേബർ സോണുകളിൽ ഏഴ് ദിവസങ്ങളിലായി ഏഴ് കായിക ഇനങ്ങൾ സംഘടിപ്പിച്ച് 20,000-ത്തിലധികം തൊഴിലാളികളെ ഉൾപ്പെടുത്തുകയാണ് ലക്ഷ്യം. ഈദുൽ ഫിത്ർ ദിനത്തിൽ ആരംഭിച്ച് റണ്ണിംഗ് റേസോടെ സമാപിക്കുന്ന പദ്ധതി തൊഴിലാളികളുടെ ശാരീരിക-മാനസിക ആരോഗ്യവും ജീവിത നിലവാരവും മെച്ചപ്പെടുത്താനാണ് രൂപകൽപ്പന ചെയ്തത്.മാന്യമായ തൊഴിൽ മൂല്യങ്ങൾ പ്രോത്സാഹിപ്പിക്കുകയും ദുബായെ തൊഴിലിനും നേട്ടങ്ങൾക്കും അനുയോജ്യമായ നഗരമായി കൂടുതൽ ശക്തിപ്പെടുത്തുകയും ചെയ്യുന്നതിൽ തഖ്ദീർ അവാർഡ് നിർണായക പങ്ക് വഹിക്കുന്നുവെന്ന് അധികൃതർ വിശദീകരിച്ചു.
