ഇലോൺ മസ്കിന്റെ എക്സ്.എ.ഐ. കമ്പനി കുട്ടികൾക്ക് മാത്രമായി ഒരു പുതിയ നിർമിത ബുദ്ധി (AI) ചാറ്റ്ബോട്ട് പുറത്തിറക്കാൻ ഒരുങ്ങുന്നു. ‘ബേബി ഗ്രോക്ക്’ എന്ന് പേരിട്ടിരിക്കുന്ന ഈ പുതിയ ഉത്പന്നം കുട്ടികൾക്ക് സുരക്ഷിതമായി ഉപയോഗിക്കാൻ കഴിയുന്ന രൂപത്തിലാണ് നിർമ്മിച്ചിരിക്കുന്നത്. ഈ വിവരം മസ്ക് തന്നെയാണ് തന്റെ സാമൂഹിക മാധ്യമ പ്ലാറ്റ്ഫോമിലൂടെ അറിയിച്ചത്.
മാർവൽ കോമിക്സിലെ ‘ബേബി ഗ്രൂട്ട്’ എന്ന കഥാപാത്രത്തിൽ നിന്ന് പ്രചോദനം ഉൾക്കൊണ്ടാണ് ഈ ചാറ്റ്ബോട്ടിന് ‘ബേബി ഗ്രോക്ക്’ എന്ന് പേരിട്ടിരിക്കുന്നത്. കുട്ടികൾക്ക് സുരക്ഷിതവും വിദ്യാഭ്യാസപരവുമായ ഉള്ളടക്കങ്ങൾ നൽകുന്നതിനായി ഇത് പ്രത്യേകം രൂപകൽപ്പന ചെയ്തിട്ടുള്ളതാണ്. കുട്ടികളെ ദോഷകരമായ ഉള്ളടക്കങ്ങളിൽ നിന്ന് സംരക്ഷിക്കാൻ ഈ ആപ്പ് സഹായിക്കുമെന്നും അദ്ദേഹം കൂട്ടിച്ചേർത്തു.
നിലവിൽ മസ്കിന്റെ എ.ഐ. കമ്പനിയുടെ ഗ്രോക്ക് എ.ഐക്ക് വിമർശനങ്ങൾ നേരിടേണ്ടിവന്നിട്ടുണ്ട്. ‘അനി’ എന്ന എ.ഐ. ചാറ്റ്ബോട്ട് ഉപയോക്താക്കളുമായി സൗഹൃദ സംഭാഷണങ്ങൾക്കപ്പുറം ചിലപ്പോൾ ലൈംഗികച്ചുവയുള്ള സംഭാഷണങ്ങളിലേക്കു പോലും കടക്കുന്നുവെന്ന് പരാതികൾ ഉയർന്നിരുന്നു. എന്നാൽ, കുട്ടികൾക്കായുള്ള പുതിയ ‘ബേബി ഗ്രോക്ക്’ ഈ പ്രശ്നങ്ങളിൽ നിന്ന് പൂർണ്ണമായും വ്യത്യസ്തമായിരിക്കുമെന്ന് മസ്ക് ഉറപ്പുനൽകുന്നു. പുതിയ ആപ്പിന്റെ ലോഞ്ചിങ് തീയതിയോ മറ്റ് സവിശേഷതകളോ സംബന്ധിച്ച കൂടുതൽ വിവരങ്ങൾ മസ്ക് പുറത്തുവിട്ടിട്ടില്ല.
