വെജിറ്റബിൾ ഫ്രൈഡ് റൈസോ പുലാവോ കഴിച്ച് മടുത്തോ?
എങ്കിൽ പുതു രുചിയിൽ, കൂടുതൽ പോഷകസമൃദ്ധമായ ഒരു പ്രോട്ടീൻ റൈസ് തയ്യാറാക്കിയാലോ? കുട്ടികളുടെ ലഞ്ച് ബോക്സിലേക്ക് അനുയോജ്യമായ ഒരു വിഭവമാണ്. കുറഞ്ഞ സമയത്തിൽ വളരെ എളുപ്പത്തിൽ തയ്യാറാക്കാൻ പറ്റുന്ന ഈ വിഭവം ആരോഗ്യത്തിനും ഉത്തമമാണ്.
ചെറുപയർ പുലാവ് തയ്യാറാക്കുന്ന വിധം:
- ആദ്യം കുക്കറിൽ ആവശ്യത്തിന് നെയ്യ് ചൂടാക്കുക.
- അതിൽ പെരുംജീരകം, കറുവപ്പട്ട, ചെറുതായി അരിഞ്ഞ സവാള, ചതച്ച ഇഞ്ചി-വെളുത്തുള്ളി, പച്ചമുളക്, തക്കാളി, ആവശ്യത്തിന് ഉപ്പ് എന്നിവ ചേർത്ത് നന്നായി വഴറ്റുക.
- ശേഷം 3 ടീസ്പൂൺ പുളിയില്ലാത്ത തൈരും, കുറച്ച് കസൂരിമേത്തിയും, ആവശ്യാനുസരിച്ച് ഗരം മസാലയും മഞ്ഞൾപൊടിയും ചേർത്ത് നന്നായി ഇളക്കി യോജിപ്പിക്കുക.
- ഇനി നേരത്തെ കുതിർത്ത് വച്ച കൈമ റൈസോ ബസ്മതി റൈസോ ചേർക്കാം.
- ഒപ്പം കുതിർത്ത് വച്ച ചെറുപയറും ആവശ്യത്തിന് വെള്ളവും ചേർക്കുക. എല്ലാം നന്നായി ഇളക്കി കുക്കർ അടയ്ക്കുക.
- അരിയുടെ തരം അനുസരിച്ച് രണ്ട് വിസിൽ വരുമ്പോൾ കുക്കർ ഓഫ് ചെയ്യുക.
- ആവി മുഴുവൻ പോയശേഷം കുക്കർ തുറക്കുമ്പോൾ ഒരു കിടിലൻ ചെറുപയർ പുലാവ് റെഡി!
