സിനിമയിലെ പകിട്ടുകൾക്കും പദവികൾക്കും അപ്പുറം തങ്ങൾക്കിടയിലുണ്ടായിരുന്ന ദൃഢമായ സൗഹൃദത്തെക്കുറിച്ച് അന്തരിച്ച നടൻ ശ്രീനിവാസൻ മുൻപ് പങ്കുവെച്ച ഓർമ്മകൾ ഇപ്പോൾ സോഷ്യൽ മീഡിയയിൽ നോവായി മാറുന്നു. ചെന്നൈയിലെ അഡയാർ ഫിലിം ഇൻസ്റ്റിറ്റ്യൂട്ടിൽ ശ്രീനിവാസന്റെ സീനിയറായിരുന്നു ശിവാജി റാവു എന്ന രജനികാന്ത്. തന്റെ പഴയ സുഹൃത്ത് പിൽക്കാലത്ത് ഇന്ത്യ കണ്ട ഏറ്റവും വലിയ സൂപ്പർസ്റ്റാറായി മാറുമെന്ന് അന്ന് കരുതിയിരുന്നില്ലെന്ന് ശ്രീനിവാസൻ പലപ്പോഴും പറഞ്ഞിട്ടുണ്ട്.
ഇരുവരും തമ്മിലുള്ള ബന്ധത്തിലെ ഏറ്റവും വൈകാരികമായ നിമിഷം ഉണ്ടായത് ‘കഥ പറയുമ്പോൾ’ എന്ന ചിത്രത്തിന്റെ റിലീസിന് ശേഷമാണ്. ഒരു സൂപ്പർതാരവും അദ്ദേഹത്തിന്റെ പഴയ സുഹൃത്തായ ബാർബറും തമ്മിലുള്ള കഥ പറഞ്ഞ സിനിമ കണ്ട തമിഴ് സംവിധായകൻ പി. വാസുവാണ് ചിത്രം കാണാൻ രജനികാന്തിനോട് നിർദ്ദേശിച്ചത്. ആ ഓർമ്മയെക്കുറിച്ച് 2008-ൽ നൽകിയ ഒരു അഭിമുഖത്തിൽ ശ്രീനിവാസൻ പറഞ്ഞത് ഇങ്ങനെയാണ്:
“ഞാൻ അന്ന് മുംബൈയിലായിരുന്നു. തിയേറ്ററിൽ എത്തിയപ്പോൾ സിനിമ അവസാനിക്കാറായിരുന്നു. കഴിഞ്ഞ് പുറത്തിറങ്ങിയ രജനികാന്തിന്റെ കണ്ണുകൾ നിറഞ്ഞിരുന്നു. വികാരാധീനനായ അദ്ദേഹം എന്നെ നോക്കി വരികയും ഏറെ നേരം കെട്ടിപ്പിടിക്കുകയും ചെയ്തു. ‘നീ എന്നെ കരയിപ്പിച്ചു കളഞ്ഞു’ എന്നാണ് അദ്ദേഹം അന്ന് എന്നോട് പറഞ്ഞത്.”
തന്റെ സുഹൃത്ത് എന്നതിലുപരി രജനികാന്ത് എന്ന മനുഷ്യസ്നേഹിയെക്കുറിച്ചും ശ്രീനിവാസൻ വാചാലനായിരുന്നു. ഇൻസ്റ്റിറ്റ്യൂട്ടിൽ കൂടെയുണ്ടായിരുന്നവരെ സാമ്പത്തികമായി സഹായിക്കുന്നതിനേക്കാൾ, അവർക്ക് സിനിമകളിൽ അവസരങ്ങൾ നൽകി അന്തസ്സോടെ ജീവിക്കാൻ സഹായിക്കാനാണ് അദ്ദേഹം എപ്പോഴും ശ്രമിക്കാറുള്ളതെന്ന് ശ്രീനിവാസൻ ഓർത്തെടുത്തു.
കഥ പറയുമ്പോൾ എന്ന സിനിമയുടെ തമിഴ് പതിപ്പായ ‘കുചേലൻ’, തെലുങ്ക് പതിപ്പായ ‘കഥാനായകുഡു’ എന്നിവയിൽ രജനികാന്ത് തന്നെയായിരുന്നു കേന്ദ്ര കഥാപാത്രത്തെ അവതരിപ്പിച്ചത്. തന്റെ പ്രിയ സുഹൃത്തിന്റെ വിടവാങ്ങലിൽ “ഗംഭീര നടനും നല്ല മനുഷ്യനുമായിരുന്നു” എന്ന് രജനികാന്ത് അനുസ്മരിക്കുമ്പോൾ, വർഷങ്ങൾക്കിപ്പുറം ആ വികാരാധീനമായ ആലിംഗനത്തിന്റെ ഓർമ്മകൾ വീണ്ടും മലയാളികളുടെ മനസ്സിൽ നിറയുകയാണ്.
